RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Með okkar augum fær verðlaun ÖBÍ

Mynd með færslu
 Mynd: RÚV
RÚV, Hlín Magnúsdóttir og Travable fengu Hvatningarverðlaubn ÖBÍ sem veitt voru af Guðna Th. Jóhannessyni við hátíðlega athöfn á Hilton Nordica hótelinu í dag.

RÚV hlaut verðlaun í flokknum umfjöllun/kynningar, fyrir að kynna og sýna þættina „Með okkar augum“ á besta áhorfstíma, TravAble hlaut verðlaun í flokki fyrirtækja/stofnana, fyrir hönnun og þróun á smáforriti með upplýsingum um aðgengi og Hlín Magnúsdóttir hlaut í flokki einstaklinga, fyrir brennandi áhuga og frumkvæði að fjölbreyttum kennsluaðferðum.

Þetta er í 11. sinn sem Öryrkjabandalagið stendur fyrir Hvatningarverðlaunum sem hafa verið veitt í tengslum við Alþjóðadag fatlaðs fólks 3. desember. Megintilgangur þeirra er að varpa ljósi á þá sem hafa með jákvæðum hætti stuðlað að einu samfélagi fyrir alla. Þrír voru tilnefndir í hverjum flokki.

Við verðlaunaafhendinguna fluttu erindi þau Þuríður Harpa Sigurðardóttir, formaður Öryrkjabandalags Íslands, Katrín Oddsdóttir, hæstaréttarlögmaður og starfsmaður málefnahóps Öryrkjabandalagsins um sjálfstætt líf og Bergþór Grétar Böðvarsson sem hlaut Hvatningarverðlaunin í flokki einstaklinga árið 2011.