RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Kosningaumfjöllun RÚV hefst 8. október

Mynd með færslu
 Mynd: RÚV
Undirbúningur RÚV fyrir alþingiskosningarnar 2017 er hafinn. Kosningaumfjöllunin verður á sérstökum kosningavef, í útvarpi og sjónvarpi og hefst 8. október. Eftirfarandi línur hafa verið lagðar en nánari útfærslur og upplýsingar um tímasetningar verða birtar síðar.

Kosningaumfjöllunin verður sem hér segir:

  • Kosningavefur RÚV, opnaður í byrjun október.
  • Tveir umræðuþættir með leiðtogum stjórnmálaflokka, 8. og 27. október.
  • Kastljós fjallar um kosningamálefnin í fjórum þáttum síðustu tvær vikurnar fyrir kosningar.
  • Forystusætið – 25 mínútna sjónvarpsviðtöl við formenn stjórnmálaflokka.
  • Kjördæmafundir í útvarpi með oddvitum allra framboða, síðustu þrjá vikurnar fyrir kosningar.
  • Málefnaumræða í útvarpi í ýmsum þáttum Rásar 1 og 2.
  • KrakkaRÚV heldur úti kosningaumfjöllun fyrir yngri kynslóðina.
  • Samfélagsmiðlar RÚV verða nýttir.
  • Kosningavaka verður að kvöldi kjördags, 28. október.

RÚV býður framboðum auk þess frían útsendingartíma fyrir kynningarefni um stefnumál sín. Þetta er gert í samræmi við 7. tölulið 2. mgr. 3.gr. laga um Ríkisútvarpið nr. 23/2013. RÚV birtir reglur þar að lútandi. Kynningarefnið verður sýnt í síðustu vikunni fyrir kosningar. Kynningarefnið þarf að vera tilbúið og því skilað til RÚV eigi síðar en 16. október.

RÚV kynnir því öll framboð í tveimur leiðtogaþáttum, með viðtölum við formenn (Forystusætið), í kjördæmaþáttum og með því að sýna kynningarefni þeirra.

Stefnt er að því að formleg kosningaumfjöllun hefjist með leiðtogaumræðum sunnudaginn 8. október. Viðtöl við formenn flokkanna (Forystusætið) hefjast mánudaginn 9. október. Þá er ráðgert að málefnaumfjöllun hefjist 16. október og kjördæmafundir 17. október. Gert er ráð fyrir að leiðtogar flokka mætist í sjónvarpssal kvöldið fyrir kjördag, þann 27. október.

Fjallað verður um framboðin og kosningarnar í fréttatímum RÚV. Gætt verður að því að gera framboðum jafn hátt undir höfði en fréttamat gildir hverju sinni. Um aðgang framboða að fréttum RÚV gilda reglur um takmarkanir á þátttöku framboða til almennra kosninga í dagskrá RÚV. Þar segir meðal annars að fréttastofa og aðrar dagskrárdeildir skuli forðast að leiða frambjóðendur fram í fréttum, fréttatengdum þáttum eða annars staðar í dagskrá eftir að framboðsfrestur rennur út og þar til kosningar eru um garð gengnar, nema sterk rök mæli með nauðsyn þess að viðkomandi komi fram, eða til viðkomandi sé vitnað vegna sérstakra atvika. Þetta á þó ekki við þegar um er að ræða sérstaka dagskrár- eða fréttapistla sem samþykktir hafa verið vegna kosningaundirbúnings.

Ríkisútvarpið áskilur sér rétt til þess að takmarka þann fjölda framboða sem mætast hverju sinni í viðtals- eða umræðuþáttum, líkt og gert var fyrir alþingiskosningarnar 2013 og 2016 og forsetakosningarnar 2016. Nánari útfærsla á leiðtogaumræðum kvöldið fyrir kjördag  verður kynnt þegar fjöldi framboða liggur fyrir. Markmiðið með þessu er að stuðla að upplýstri umræðu í aðdraganda kosninga og skila áhorfendum meiru en umræðum allra framboða á sama tíma. Með þessari framkvæmd er meðal annars brugðist við ábendingum sem koma fram í skýrslu Öryggis- og samvinnustofnunar Evrópu (ÖSE) um framkvæmd alþingiskosninganna 2013. Í skýrslunni kemur meðal annars fram að frambjóðendur og áhorfendur töldu að skort hefði á dýptina í umræðuþáttum með of mörgum þátttakendum. Hér má finna skýrslu ÖSE frá 2013