Vetrarþjónusta á vegum aukin strax

05.01.2018 - 12:26
Mynd með færslu
 Mynd: Rögnvaldur Már Helgason  -  RÚV
Fjármagn til vetrarþjónustu á vegum verður aukið um sjötíu og fimm milljónir króna á þessu ári. Samgönguráðherra segir þetta hafa fengist með endurskoðun á reglum um vetrarþjónustu. Mest verður viðbótin á veginum fyrir austan Vík.

Umferð um vegi landsins hefur aukist mikið undanfarin ár. Á hringveginum nemur aukningin fjörutíu og fjórum prósentum frá tvö þúsund og tólf. Þá hefur einnig komið fram að þrettán banaslys urðu í umdæmi lögreglunnar á Suðurlandi á nýliðnu ári, þótt það séu reyndar ekki allt umferðarslys.

Sigurður Ingi Jóhannsson samgönguráðherra kallaði eftir upplýsingum frá Vegagerðinni um stöðuna, og hefur nú ákveðið að bregðast við henni. „Við erum að taka ákvörðun um að breyta reglum sem hafa ekki verið endurskoðaðar í nokkur misseri en þörfin er brýn. Við ætlum að bæta þjónustu, ekki síst á Suðurlandi en líka á Vesturlandi, Vestfjörðum og Norðurlandi. Við ætlum því að auka vetrarþjónustuna um allt land um tæpar 75 milljónir.“

Sigurður Ingi segir að mesta aukningin verði á veginum fyrir austan Vík, þar sem umferðin hefur aukist mest þar. Þar varð einmitt rútuslys milli jóla og nýárs þar sem einn lést. Meðal annarra vega nefnir Sigurður Ingi vegina um Dyrhólaey, Vatnskarðshóla og við Skógafoss, auk nokkurra vega í uppsveitum Suðurlands. Þá verður þjónusta einnig aukin á veginum milli Borgarness og Vegamóta á Snæfellsnesi, við Bíldudal, í Skutulsfirði, Eyjafirði og Svarfaðardal.

 

„Ég efa það ekki að aukningin þurfi að vera komin til að vera því að ég sé ekkkert annað í kortunum en að umferðin aukist áfram, ekki síður yfir veturinn, og þá þarf þjónustan að fylgja eftir til að tryggja umferðaröryggi,“ segir Sigurður Ingi.

 

Aukningin kemur til framkvæmda strax. Sigurður Ingi segir að með þessu sé verið að auka þjónustu þar sem umferðin hefur aukist mest. „Þegar ég fór fram á þessa skoðun hjá Vegagerðinni á að kortleggja hvernig staðan væri miðað við umferðarþunga og þessa breytingu sem hefur orðið á síðustu árum þá er þetta niðurstaðan. Ég er mjög ánægður með viðbrögð Vegagerðarinnar hvað það varðar.“

 

Mynd með færslu
Hallgrímur Indriðason
Fréttastofa RÚV